કાચુ મટન અને કાચી માછલી ખાતો હાલોલનો યુવક
25 મિનિટમાં 17 માછલી ચાવી ગયો
લીમ્કાબુક કે ગિનિસ બુકમાં નામ નોંધાવવાની ઈચ્છા
By ENN,
હાલોલ,
કાચા શાકભાજી ખાનાર તો ઘણા લોકો જોયા હશે પણ હાલોલનો એક યુવાન તો કાચુ મટન અને માછલી ચપોચપ ખાઈ જઈ લોકોને દંગ કરી દીધાં છે. ફાંટા તળાવ પાસે રહેતો યુવાન પ્રતિદિન 500 ગ્રામ જીવતી માછલી અને 500 ગ્રામ કાચુ મટન આરોગી રહ્યો છે. પોતાની આ સિધ્ધ બદલ તે લીમ્બાબુક અથવા ગિનિસ બુકમાં નામ નોંધાવવાની મહેચ્છા ધરાવી રહ્યો છે. હાલોલના ફાંટાતળાવ પાસે રહેતા દિલીપભાઈ મારવાડી ગત ગુરુવારે બપોરે 12 વાગ્યાના અરસામાં હાલોલ તળાવની પાળ પર બેસીને 2 કિલો જીવતી માછલીના 17 નંગ માત્ર 25 મિનિટમાં આરોગી ગયા હતા. માછલીના શરીરમાં પીત્ત નામની એક નાની થેલી આવે તે ફુટી જાય તો આખી માછલી કડવી ઝેર જેવી થઈ જાય છે. આ ઉપરાંત માછલીના શરીરની ઉપરના ભાગે પીંગલા આવે તે એટલા કડક આવે તેને કાપવા માટે ચપ્પુનો ઉપયોગ કરવો પડે છે જ્યારે આ યુવાન દ્ધારા માત્ર 25 મિનિટમાં અંદાજે બે કિલો વજનની 17 નંગ જીવતી માછલી પીત્ત તથા પીંગલા સાથે સ્વાહા કરી જતાં ઉપસ્થિત લોકો મોંમા આંગળા નાખી ગયા હતા.
સામાન્ય દિવસોમાં આ વ્યક્તિ 500 ગ્રામ મચ્છી અને 500 ગ્રામ કાચુ મટન આરોગે છે. કાચુ મટન અને મચ્છી જંગલી જાનવરો જ પચાવી શકે છે. આ સામાન્ય લાગતો માણસ કાચુ મટન અને માછલી ખાય છે છતાં તેના પાચનતંત્રમાં કોઈ જ ખામી સર્જાતી નથી. ક્યારેય અપચો કે પેટમાં દુખાવાની ફરિયાદ પણ થતી નથી. ગુરુવારે મચ્છીના વેપારી પાસે બે કિલો મચ્છી લઈ તળાવની પાર ઉપર પાણી ભરેલા તગારામાં મુકી ગાજર મુળા ખાતો હોય તેમ આરામથી માત્ર 25 મિનીટમાં 17 નંગ માછલી આરોગી ગયો હતો. દિલીપની આ હરકત જોઈને હાજર લોકો આશ્ચર્યચકિત બની ગયા હતા, અમુક લોકોએ તેને આધુનિક જમાનાના ભીમ અને કુંભકર્ણ સાથે સરખાવ્યો હતો.
